मेरु क्या कसूर छा

मेरु क्या कसूर छा

रीति अर रिवाजो का नाम पर
कुजाणी कब तल्क मिटणु रौलू मैं
आंख्यो का आंसू पोंछी कें
मैं पूछी अपणी माँ थैं
किले दिनी त्वैन मैं बेटी कु जन्म
बोल मेरी माँजी मेरु क्या कसूर छा
जू मिली मैथै बेटी कु जन्म

क्या दर्द अर पीड़ा बनी कें रलू यो मेरु जीवन
तेरी कोख मा ही नोऊ मैना पली चौं मैं
ऐकें ईं धरती मा मैं भी त्वै सुख देलु
माना कि ह्वौ जौलू मैं विराणी पर त्वै न बिसरौलू

तू ही छा जू मेरी पीड़ा समज्दी
तिरस्कार भी झेली व झेली अपमान भी
फिर भी दिनी त्वैन जन्म मैकै सारी सब पीड़ा
वचन छा मेरु देलु सब सुख त्वै

हे मानव बेटियौं कें न समझा अभिशाप
औंण दयवा हम्कैं भी इन दुनिया मा
हमारू भी आस्तित्व रण दियवा

बेटियौं कें भी अपणु प्यार दियवा